من انا ؟

انا من حب بجنون  

كلمة (من انا ) اذكرها في كتاب المطالعة ايام الابتدائية مسوين فيها تربية حديثه حاط لك لغزة داخل نشيده واحفظها واخرتها يطلع القط مدري الارنب !! 

عموما انا واحد من الشعب السعودي ، دخلت في عالم الانترنت منذو عام 98م  يعني أول مادخل الانترنت وكان جدا بطيئ الى درجة الملل ، وكان أول كافي نت ادخل عن طريقة محل موجود في حي الملز بالرياض خلف تلفزيون الدعاية والاعلان المعروف جدا في شارع الستين ، ومالكم بالطويلة دخلت المقهى وكان فيه فلبيني وماعنده احد نهائيا قلت له ودي ادخل انترنت !! استانس الرجال وانبسط شكله ما احد طق له خبر وجيت انا و وسعت صدره  

فتح لي جهاز كومبيوتر وكانت له رهبه ذاك الوقت لكن الحين زيه زي قلته ، المهم وفتح لي شات مايكرسوفت وقالي تكلم مع اللي هنا !! انا قلت له وش هذا قال هذا شات وانا ماعرف وش معنى شات قلت وش يعني قال انت هنا وتتكلم مع الاخرين في كل مكان عاد انا على نياتي قلت وشلون اتكلم مع ناس ما اعرفهم ؟؟ انا ودي ادخل موقع شركة تويوتا وبس قال طيب 

ويقوم ويفتح لي موقع شركة تويوتا علشان اتصفحه واشوفه وتدرون وش كان المقصد من دخول موقع تويوتا ؟؟ 

بس علشان اشووف وشلون شكل الهاي لوكس الجديد علشان كنت ناوي اشتري وحده مثلها !! 

وبعدها وبسبب البطئ الشديد الى درجه الملل في الانترنت وقلة المواقع العربية ماكان فيه اقبال عليه لكن انا فتحت لي ايميل على الهوتميل بأسم العائلة موجود عندي من عام 98 وانقطعت عن الانترنت الا من دخلات خفيفه من وقت لاخر .

في عام 2000 م كانت دخلتي الحقيقة في عالم الانترنت وحتى الان انا من اشهر متصفحي الانترنت والنتيجه حتى الان 

لم استفد من الانترنت اي فائده الا اني تعرفت على مجموعة من الاصحاب الذين افتخر فيهم .. 

وش اللي قدمته في عالم الانترنت حتى الان لا اعتقد باني قدمت شي مفيد للانترنت .. 

بالنسبة لي انا :

درست شبكات الحاسب الالي عن طريق معهد نيوهورايزن

وذلك بأستشارة شخص وكانت توهيقة لاني لم استفد من دراستي شيئا وكانت عندي ميول لتصميم البرامج حتى اني اذكر اول برنامج دات بيس صممته عن طريق الاكسس وكان جدا جميل رغم امكانياتي البسيطة لكن استشارتي كانت خاطئة . 

معي دورة في ادارة المراكز الحاسبات الالية من معهد الادارة .

عملت في مجال المستودعات وادارة  مراقبة المخزون ومازلت اعمل فيها .. 

من المهام التي قمت بها :-

تطوير انظمة المستودعات في الحاسب الالي ولكن لم يتم حتى الان تطبيق النظام والسبب سوء الادارة واختيارها السيئ للشركة المنفذة للمشروع . 

تطوير نظام تصنيف الاصناف المستخدمة في الجهة . 

المهارات التي اتمتع بها :-

اني اذا جلست فاضي تطلع عندي افكار كثيره .. لكن التطبيق ما اقدر عليه لاني عجاز جدا .. وتصدقون من شدة عجزي افكر احيانا اني ما اكمل هالصفحة !! 

اعشق التقنية وكنت مشترك في مجلة بي سي بس ما ادري هي تنزل الى الحين أو لا ؟؟ 

اسولف بالكمبيوتر والتقنية كثير .. اتابع الاخبار عن طريق النت والتطورات .. 

في النهاية اكتشفت اني شخص غير منتج وانفع بس اكون مدير اعطي اوامر فقط .. 

وعلى فكره انا عضو في شبكة ابونواف ، وفي السابق كنت مشرف عندهم في المجالس ايام ماكانت فيه مجالس  وكنت ماسك قسم (نص كم ) .

 

للتعليق والحش اكتب أدناهـ *)